అవిజ్ఞాతస్వరూపాయ కైవల్యాయామృతాయ చ || ౧ ||
యం న దేవా విజానంతి మనో యత్రాపి కుంఠితమ్ |
న యత్ర వాక్ ప్రసరతి నమస్తస్మై చిదాత్మనే || ౨ ||
యోగినో యం హృదాకాశే ప్రణిధానేన నిశ్చలాః |
జ్యోతిరూపం ప్రపశ్యంతి తస్మై శ్రీబ్రహ్మణే నమః || ౩ ||
కాలాత్ పరాయ కాలాయ స్వేచ్ఛయా పురుషాయ చ |
గుణత్రయస్వరూపాయ నమః ప్రకృతిరూపిణే || ౪ ||
విష్ణవే సత్త్వరూపాయ రజోరూపాయ వేధసే |
తమసే రుద్రరూపాయ స్థితిసర్గాంతకారిణే || ౫ ||
నమో బుద్ధిస్వరూపాయ త్రిధాహంకృతయే నమః |
పంచతన్మాత్రరూపాయ పంచకర్మేంద్రియాత్మనే || ౬ ||
నమో మనః స్వరూపాయ పంచబుద్ధీంద్రియాత్మనే |
క్షిత్యాది పంచరూపాయ నమస్తే విషయాత్మనే || ౭ ||
నమో బ్రహ్మాండరూపాయ తదంతర్వర్తినే నమః |
అర్వాచీన పరాచీన విశ్వరూపాయ తే నమః || ౮ ||
అనిత్యనిత్యరూపాయ సదసత్పతయే నమః |
సమస్తభక్తకృపయా స్వేచ్ఛావిష్కృతవిగ్రహ || ౯ ||
తవ నిశ్వసితం దేవాః తవ స్వేదోఽఖిలం జగత్ |
విశ్వా భూతాని తే పాదః శీర్ష్ణో ద్యౌః సమవర్తత || ౧౦ ||
నాభ్యా ఆసీదంతరిక్షం లోమాని చ వనస్పతిః |
చంద్రమా మనసో జాతః చక్షోః సూర్యస్తవ ప్రభో || ౧౧ ||
త్వమేవ సర్వం త్వయి దేవ సర్వం
స్తోతా స్తుతి స్తవ్య ఇహ త్వమేవ |
ఈశా త్వయా వాస్యమిదం హి సర్వం
నమోఽస్తు భూయోఽపి నమో నమస్తే || ౧౨ ||
ఇతి స్తుత్వా విధిం దేవాః నిపేతుర్దండవత్ క్షితౌ |
పరితుష్టస్తదా బ్రహ్మా ప్రత్యువాచ దివౌకసః || ౧౩ ||
బ్రహ్మోవాచ |
యథార్థయాఽనయా స్తుత్యా తుష్టోఽస్మి ప్రణతాః సురాః |
ఉత్తిష్ఠత ప్రసన్నోఽస్మి వృణుధ్వం వరముత్తమమ్ || ౧౪ ||
యః స్తోష్యత్యనయా స్తుత్యా శ్రద్ధావాన్ ప్రత్యహం శుచిః |
మాం వా హరం వా విష్ణుం వా తస్య తుష్టాః సదా వయమ్ || ౧౫ ||
దాస్యామః సకలాన్ కామాన్ పుత్రాన్ పౌత్రాన్ పశూన్ వసు |
సౌభాగ్యమాయురారోగ్యం నిర్భయత్వం రణే జయమ్ || ౧౬ ||
ఐహికాముష్మికాన్ భోగాన్ అపవర్గం తథాఽక్షయమ్ |
యద్యదిష్టతమం తస్య తత్తత్సర్వం భవిష్యతి || ౧౭ ||
తస్మాత్ సర్వప్రయత్నేన పఠితవ్యః స్తవోత్తమః |
అభీష్టద ఇతి ఖ్యాతః స్తవోఽయం సర్వసిద్ధిదః || ౧౮ ||
ఇతి శ్రీస్కాందపురాణే కాశీఖండే అభీష్టద నామ శ్రీ బ్రహ్మ స్తవమ్ ||