ಜಗತಿ ಪ್ರಚಯಾಯ ಧರ್ಮಮಾರ್ಗಸ್ಯ |
ಕಥಯಾಶು ತತ್ಕರೋಮ್ಯಹ-
-ಮಹರ್ನಿಶಂ ತತ್ರ ಮಾ ಕೃಥಾ ವಿಶಯಮ್ || ೧ ||
ಗಣನಾಂ ವಿಧಾಯ ಮತ್ಕೃತ-
-ಪಾಪಾನಾಂ ಕಿಂ ಧೃತಾಕ್ಷಮಾಲಿಕಯಾ |
ತಾಂತಾದ್ಯಾಪ್ಯಸಮಾಪ್ತೇ-
-ರ್ನಿಶ್ಚಲತಾಂ ಪಾಣಿಪಂಕಜೇ ಧತ್ಸೇ || ೨ ||
ವಿವಿಧಾಶಯಾ ಮದೀಯಂ
ನಿಕಟಂ ದೂರಾಜ್ಜನಾಃ ಸಮಾಯಾಂತಿ |
ತೇಷಾಂ ತಸ್ಯಾಃ ಕಥಮಿವ
ಪೂರಣಮಹಮಂಬ ಸತ್ವರಂ ಕುರ್ಯಾಮ್ || ೩ ||
ಗತಿಜಿತಮರಾಲಗರ್ವಾಂ
ಮತಿದಾನಧುರಂಧರಾಂ ಪ್ರಣಮ್ರೇಭ್ಯಃ |
ಯತಿನಾಥಸೇವಿತಪದಾ-
-ಮತಿಭಕ್ತ್ಯಾ ನೌಮಿ ಶಾರದಾಂ ಸದಯಾಮ್ || ೪ ||
ಜಗದಂಬಾಂ ನಗತನುಜಾ-
-ಧವಸಹಜಾಂ ಜಾತರೂಪತನುವಲ್ಲೀಮ್ |
ನೀಲೇಂದೀವರನಯನಾಂ
ಬಾಲೇಂದುಕಚಾಂ ನಮಾಮಿ ವಿಧಿಜಾಯಾಮ್ || ೫ ||
ಭಾರೋ ಭಾರತಿ ನ ಸ್ಯಾ-
-ದ್ವಸುಧಾಯಾಸ್ತದ್ವದಂಬ ಕುರು ಶೀಘ್ರಮ್ |
ನಾಸ್ತಿಕತಾನಾಸ್ತಿಕತಾ-
-ಕರಣಾತ್ಕಾರುಣ್ಯದುಗ್ಧವಾರಾಶೇ || ೬ ||
ನಿಕಟೇ ವಸಂತಮನಿಶಂ
ಪಕ್ಷಿಣಮಪಿ ಪಾಲಯಾಮಿ ಕರತೋಽಹಮ್ |
ಕಿಮು ಭಕ್ತಿಯುಕ್ತಲೋಕಾ-
-ನಿತಿ ಬೋಧಾರ್ಥಂ ಕರೇ ಶುಕಂ ಧತ್ಸೇ || ೭ ||
ಶೃಂಗಾದ್ರಿಸ್ಥಿತಜನತಾ-
-ಮನೇಕರೋಗೈರುಪದ್ರುತಾಂ ವಾಣಿ |
ವಿನಿವಾರ್ಯ ಸಕಲರೋಗಾನ್
ಪಾಲಯ ಕರುಣಾರ್ದ್ರದೃಷ್ಟಿಪಾತೇನ || ೮ ||
ಮದ್ವಿರಹಾದತಿಭೀತಾನ್
ಮದೇಕಶರಣಾನತೀವ ದುಃಖಾರ್ತಾನ್ |
ಮಯಿ ಯದಿ ಕರುಣಾ ತವ ಭೋ
ಪಾಲಯ ಶೃಂಗಾದ್ರಿವಾಸಿನೋ ಲೋಕಾನ್ || ೯ ||
ಸದನಮಹೇತುಕೃಪಾಯಾ
ರದನವಿನಿರ್ಧೂತಕುಂದಗರ್ವಾಲಿಮ್ |
ಮದನರಿಪುಸಹೋತ್ಥಾಂ
ಸರಸಿಜಭವಭಾಮಿನೀಂ ಹೃದಾ ಕಲಯೇ || ೧೦ ||
ಇತಿ ಶ್ರೀಸಚ್ಚಿದಾನಂದಶಿವಾಭಿನವನೃಸಿಂಹಭಾರತೀಸ್ವಾಮಿಭಿಃ ವಿರಚಿತಂ ಶ್ರೀ ಶಾರದಾ ದಶಕಮ್ ||