देवेशि भक्त सुलभे देवनायकवन्दिते ।
भक्तानां कार्यसिद्ध्यर्थं निदान ब्रूहि तत्त्वतः ॥ १ ॥
विनैव न्यासजालेन पूजनेन विना भवेत् ।
विना कायादिक्लेशेन वित्तव्ययं विनेश्वरि ॥ २ ॥
अस्य श्रीबटुकभैरव सहस्रनाम स्तोत्रमन्त्रस्य ब्रह्मानन्दभैरव ऋषिः त्रिष्टुप् छन्दः बटुकभैरवो देवता बं बीजं ह्रीं शक्तिः सर्वाभीष्टसिद्ध्यर्थे जपे विनियोगः ॥
न्यासः –
करन्यासः –
ओं ह्रां बां अङ्गुष्ठाभ्यां नमः ।
ओं ह्रीं बीं तर्जनीभ्यां नमः ।
ओं ह्रूं बूं मध्यमाभ्यां नमः ।
ओं ह्रैं बैं अनामिकाभ्यां नमः ।
ओं ह्रौं बौं कनिष्ठिकाभ्यां नमः ।
ओं ह्रः बः करतलकरपृष्ठाभ्यां नमः ।
हृदयादिन्यासः –
ओं ह्रां बां हृदयाय नमः ।
ओं ह्रीं बीं शिरसे स्वाहा ।
ओं ह्रूं बूं शिखायै वषट् ।
ओं ह्रैं बैं कवचाय हुम् ।
ओं ह्रौं बौं नेत्रत्रयाय वौषट् ।
ओं ह्रः बः अस्त्राय फट् ।
अथ ध्यानम् –
उद्यद्भास्करसन्निभं त्रिनयनं रक्ताङ्गरागस्रजं
स्मेरास्यं वरदं कपालमभयं शूलं दधानं करैः ।
नीलग्रीवमुदारकौस्तुभधरं शीतांशुचूडोज्ज्वलं
बन्धूकारुणवाससं भयहरं देवं सदा भावयेत् ॥ ३ ॥
अथ स्तोत्रं –
॥ ओं ह्रीम् ॥
बटुकः कामदो नाथोऽनाथप्रियप्रभाकरः ।
भैरवो भीतिहा दर्पः कन्दर्पो मीनकेतनः ॥ ४ ॥
रुद्रो बटुकभूतीशो भूतनाथः प्रजापतिः ।
दयालुः क्रूर ईशानो जनीशो लोकवल्लभः ॥ ५ ॥
देवो दैत्येश्वरो वीरो वीरवन्द्यो दिवाकरः ।
बलिप्रियः सुरश्रेष्ठः कनिष्ठो नैष्ठिकः शिशुः ॥ ६ ॥
महाबलो महातेजा वित्तेजो द्युतिवर्धनः ।
तेजस्वी वीर्यवान् वृद्धो विवृद्धो भूतनायकः ॥ ७ ॥
बालकः पालकः कामो विकामः काममर्दनः ।
कालिकारमणः कालीनायकः कालिकाप्रियः ॥ ८ ॥
कालीशः कालिकाकान्तः कालिकानन्दवर्धनः ।
कालिकाहृदयज्ञानी कालिकातनयो नयः ॥ ९ ॥
खगेशः खेचरः खेटो विशिष्टो खेटकप्रियः ।
कुमारः क्रोधनः कालिप्रियः पर्वतरक्षकः ॥ १० ॥
गणेज्यो गणपो गूढो गूढप्रायो गणेश्वरः ।
गणनाथो गणश्रेष्ठो गणमुख्यो गणप्रियः ॥ ११ ॥
घोरनादो घनश्यामो घनस्वामी घनान्तकः ।
घोरनाशो घनेशानो धनपतिर्धनात्मकः ॥ १२ ॥
चम्पकाभश्चिरञ्जीवी चारुवेषश्चराचरः ।
चिन्त्योऽचिन्त्यगुणो धीमान् सुचित्तस्थश्चितीश्वरः ॥ १३ ॥
छत्री छत्रपतिश्छत्ता छिन्ननासा मनः प्रियः ।
छिन्नाभश्छिन्नसन्तापश्छद्दीराच्छर्दिनान्तकः ॥ १४ ॥
जेता जिष्णुर्जहीशानो जनानन्दो जनेश्वरः ।
जनको जनसन्तोषो जयजायविनाशनः ॥ १५ ॥
जालन्धरो जनाराध्यो जनाध्यक्षो जनप्रियः ।
जीवहा जीवदो जन्तुर्जीवनाथो जलेश्वरः ॥ १६ ॥
जयदो जित्वरो जिह्वो जयश्रीर्जयवर्धनः ।
जयाभूमिर्जयाकारो जयहेतुर्जयेश्वरः ॥ १७ ॥
झङ्कारकृदनन्तात्मा झङ्कारहेतुरात्मभूः ।
झञ्योश्चरी हरीभर्ता विभर्ता भृत्यकेश्वरः ॥ १८ ॥
टीत्कारहृदयेयात्मा टङ्केशो ठङ्कनायकः ।
ठकारभू ठरन्ध्रीशो गिरिपृष्ठकुरः पतिः ॥ १९ ॥
ढुण्ढिर्ढक्काप्रियः पान्थो ढुण्ढिराजो निरन्तकः ।
ताम्रस्तमीश्वरस्तोता तीर्थराजस्तडित्प्रभः ॥ २० ॥
त्र्यक्षस्त्र्यक्षकस्तम्भस्ताक्षकस्तम्भटेश्वरः ।
स्थलस्थः स्थावरः स्थाता स्थिरबुद्धिः स्थिरेन्द्रियः ॥ २१ ॥
स्थिरज्ञानी स्थिरप्रीतिः स्थिरस्थीतिः स्थिराशयः ।
दामो दामोदरो दम्भो दाडिमीकुसुमप्रियः ॥ २२ ॥
दारिद्र्यहा दमी दिव्यो दिव्यदेहो दिनप्रभुः ।
दिनकरो दिवानाथो दिवसेशो दिवाकरः ॥ २३ ॥
दीर्घश्चरो दलज्योतिर्दलेशो दलसुन्दरः ।
दलप्रियो दलाभाशो दलपूज्यो दलप्रभुः ॥ २४ ॥
दलकातिर्दलाकारो दलसेव्यो दलार्चितः ।
दीर्घबाहुर्दलश्रेष्ठो दललुब्धो दलाकृतिः ॥ २५ ॥
दानवश्यो दयासिन्धुर्दयालुर्दीपवल्लभः ।
धनेशो धनदो धर्मो धनराजो धनप्रभुः ॥ २६ ॥
धनप्रदो धनाध्यक्षो धनमान्यो धनञ्जयः ।
धीवरो धातुको धाता ध्रुवो धूमलवर्धनः ॥ २७ ॥
धनिष्ठो धवलच्छत्री धनकाम्यो धनेश्वरः ।
धीरो धीरतरो धेनुर्धीरेशो धरणीप्रभुः ॥ २८ ॥
धराधीशो धरानाथो धरणीनायको धरः ।
धराकान्तो धरापालो धरणीजनवल्लभः ॥ २९ ॥
धराधरो धरो धृष्टो धृतराष्ट्रो धनीश्वरः ।
नारदो नीरदो नेता नीतिपूज्यो नतिप्रियः ॥ ३० ॥
नीतिलभ्यो नतीशानो नीतिलब्धो नतीश्वरः ।
पार्थिवः पार्थसम्पूज्यः पार्थदः प्रणतः पृथुः ॥ ३१ ॥
पृथिवीशः पृथासूनुः पृथिवीभृत्य ईश्वरः ।
पुराणः पारदः पान्थः पाञ्चालीपावकः प्रभुः ॥ ३२ ॥
पूर्वसुरपतिः श्रेयान् प्रीतिदः प्रीतिवर्धनः ।
पार्वतीशः परेशानः पार्वतीहृदयप्रियः ॥ ३३ ॥
पार्वतीरमणः पूतः पवित्रः पापनाशनः ।
पात्री पत्रालिसन्तुष्टः परितुष्टः पुमान् प्रियः ॥ ३४ ॥
पर्वेशः पर्वताधीशः पर्वतो नायकात्मजः ।
फाल्गुनस्तु फणानाथः फणीशः फणरक्षकः ॥ ३५ ॥
फणीपतिः फणीशानः फणराजः फणाकृतिः ।
बलभद्रो बली बालो बलधीर्बलवर्धनः ॥ ३६ ॥
बलप्राणो बलाधीशो बलिदानप्रियङ्करः ।
बलिराजो बलिप्राणो बलिनाथो बलप्रियः ॥ ३७ ॥
बलीवरश्च बालेशो बालकप्रियदर्शनः ।
भद्रो भद्रप्रभो भीमो भीमसेनो भयङ्करः ॥ ३८ ॥
भव्यो भव्यप्रियो भूतपतिर्भूतविनायकः ।
भूतेशो भूतिदो भर्गो भूतभव्यो भवेश्वरः ॥ ३९ ॥
भवानीशो भवेशानो भवानीनायकोर्भकः ।
मकारो माधवो मीनो मीनकेतुर्महेश्वरः ॥ ४० ॥
महेशुमर्दनो मन्थो मिथुनेशोऽमराधिपः ।
मरीचिर्मञ्जुलो मोहो मोहहा मोहमर्दनः ॥ ४१ ॥
मोहको मोहनो मेधाप्रियो मोहविनायकः ।
महीपतिर्महेशानो महीराजो मनोहरः ॥ ४२ ॥
महीश्वरो महीपालो महीनाथो महीप्रियः ।
महीधरो महादेवो मनुराजो मनुप्रियः ॥ ४३ ॥
मौनी मौनधरो मेधो मन्दारो मतिवर्धनः ।
मतिदो मन्थरो मन्त्रो मन्त्रीशो मन्त्रनायकः ॥ ४४ ॥
मेधावी मानदो मानी मानहा मानमर्दनः ।
मीनगो मकराधीशो मधुरो मणिरञ्जितः ॥ ४५ ॥
मणिरम्यो मणिभ्राता मणिमण्डनमण्डितः ।
मन्त्रपो मन्त्रदो मुग्धो मोक्षदो मोक्षवल्लभः ॥ ४६ ॥
मल्लो मल्लप्रियो मञ्चो मल्लको मेलनप्रभुः ।
मल्लिको मल्लिकागन्धी मल्लिकाकुसुमप्रियः ॥ ४७ ॥
मालतीशो मघानाथोऽमोघमूर्तिर्मघेश्वरः ।
मूलाभो मूलहा मूलो मूलदो मूलमत्सरः ॥ ४८ ॥
माणिक्यरोचिः सम्मुग्धो मणिकूटो मणिप्रियः ।
मुकुन्दो मदनो मन्दो मदवन्द्यो मनुप्रभुः ॥ ४९ ॥
मनस्थो मेनकाधीशो मेनकाप्रियदर्शनः ।
यामो यामो यमी देवो यादवो यदुनायकः ॥ ५० ॥
याचको याज्ञिको यज्ञो यज्ञेशो यज्ञवर्धनः ।
रमापती रमाधीशो रमेशो रामवल्लभः ॥ ५१ ॥
रमापती रमानाथो रमाकान्तो रमेश्वरः ।
रेवतीरमणो रामो रामेशो रामनन्दनः ॥ ५२ ॥
रम्यमूर्ती रतीशानो राकाया नायको रविः ।
लक्ष्मीधरो ललज्जिह्वो लक्ष्मीबीजजपे रतः ॥ ५३ ॥
लम्पटो लम्बराजेशो लम्बदेशो लकारभूः ।
वामनो वल्लभो वन्द्यो वनमाली वनेश्वरः ॥ ५४ ॥
वनस्थो वनगो विन्ध्यो विन्ध्यराजो वनाह्वयः ।
वनेचरो वनाधीशो वनमालाविभूषणः ॥ ५५ ॥
वेणुप्रियो वनाकारो वनाराध्यो वनप्रभुः ।
शम्भुः शङ्करसन्तुष्टः शम्बरारिः शरासनः ॥ ५६ ॥
शबरीप्रणतः शालः शिलीमुखध्वनिप्रियः ।
शकुलः शल्लकः शीतः शीतिरश्मिः सितांशुकः ॥ ५७ ॥
शीलदः शीकरः शीलः शीलशीली शनैश्चरः ।
सिद्धः सिद्धिकरः साध्यः सिद्धिभूः सिद्धिभावनः ॥ ५८ ॥
सिद्धान्तवल्लभः सिन्धुः सिन्धुतीरनिषेवितः ।
सिन्धुपतिः सुरोधीरः सरसीरुहलोचनः ॥ ५९ ॥
सरित्पतिः सरित्संस्थः सरः सिन्धुः सरोवरः ।
सखा वीरपतिः सूतः सचेताः सत्पतिः सितः ॥ ६० ॥
सिन्धुराजः सदाभूतः सदाशिवः सताम्पतिः ।
सदीशः सदनः सूरिः सेव्यमानसतीपतिः ॥ ६१ ॥
सूर्यः सूर्यपतिः सेव्यः सेवाप्रियः सनातनः ।
सतीशः सरशीनाथः सतीराजः सतीश्वरः ॥ ६२ ॥
सतीप्राणः सतीनाथः सतीसेव्यः सतीश्वरः ।
सिद्धिराजः सतीतुष्टः सचिवः सव्यवाहनः ॥ ६३ ॥
सतीनायकसन्तुष्टः सव्यसाची सुमन्तकः ।
सच्चित्तः सर्वसन्तोषी सर्वारामः सुसिद्धिदः ॥ ६४ ॥
सर्वाराध्यः सचिवाख्यः सतीपतिसुसेवितः ।
सागरः सगरसार्थः समुद्रः समुद्रप्रियः ॥ ६५ ॥
समुद्रतीरसन्तुष्टः समुद्रप्रियदर्शनः ।
समुद्रेशः सरोनाथः सरसिजविलोचनः ॥ ६६ ॥
सरसीजलदाकारः सरसीजलदार्चितः ।
समुद्रिकः समुद्रात्मा साध्यमानः सुरेश्वरः ॥ ६७ ॥
सुरसेव्यः सुरेशानः सुरनाथः सुरार्चितः ।
सुराध्यक्षः सुराराध्यः सुरवन्द्यविशारदः ॥ ६८ ॥
सुरमुख्यः सुरप्रायः सुरसिन्धुनिवासवान् ।
सुधाप्रियः सुधाधीशः सुधाराध्यः सुधापतिः ॥ ६९ ॥
सुधानाथः सुधाभूतः सुधासागरसेवितः ।
हाटको हीरको हन्ता हरिकस्यरुचिः प्रभुः ॥ ७० ॥
हव्यवाहो हरिद्राभो हरिद्रारसमर्दनः ।
हेतिर्हेतुर्हरित्राता हरिनाथो हरिप्रियः ॥ ७१ ॥
हरिपूज्यो हरिप्राणो हरिहृष्टो हरीन्द्रकः ।
हरीशो हन्तृको हीरो हरिनामपरायणः ॥ ७२ ॥
हरिमुग्धो हरीरम्यो हरिदासो हरीश्वरः ।
हरो हरिपतिर्हारो हरिणीचित्तहारकः ॥ ७३ ॥
हरहितो हरप्राणो हरिवाहनशोभनः ।
हासो हासप्रियो हूहूर्हुतभुग् हुतवाहनः ॥ ७४ ॥
हुताशनो हली हक्को हालाहलहलायुधः ।
हलाकारो हलीशानो हलिपूज्यो हलिप्रियः ॥ ७५ ॥
हरपुत्रो हरोत्साहो हरसूनुर्हरात्मजः ।
हरवन्द्यो हराधीशो हरान्तको हराकृतिः ॥ ७६ ॥
हरमान्यो हराङ्कस्थो हरवैरिविनाशनः ।
हरशत्रुर्हरावर्षोऽहङ्कारो हरिणीप्रियः ॥ ७७ ॥
हाटकेशो हटेशानो हाटकप्रियदर्शनः ।
हाटको हाटकप्राणो हाटभूषणभूषितः ॥ ७८ ॥
हेतिदो हन्तको हंसो हंसगतिर्हाराह्वयः ।
हंसीपतिर्हरोन्मत्तो हंसीशो हरवल्लभः ॥ ७९ ॥
हरपुष्पप्रभो हंसीप्रियो हंसविलासकः ।
हरबीजरतो हारी हरितो हरिताम्पतिः ॥ ८० ॥
हरित्प्रभुर्हरित्पालो हरिरन्तरनायकः ।
हरिद्दिशो हरित्प्राणो हरिप्रियप्रियो हितः ॥ ८१ ॥
हेरम्बो हुङ्कृतिक्रुद्धो हेरम्बानन्दनो हठी ।
हेरम्बप्राणसंहर्ता हेरम्बहृदयप्रियः ॥ ८२ ॥
क्षमापतिः क्षणः क्षान्तः क्षुरधारः क्षितीश्वरः ।
क्षितीशः क्षितितः क्षीणः क्षितिपालः क्षितिप्रभुः ॥ ८३ ॥
क्षितीशानः क्षितिप्राणः क्षितिनायकसत्प्रियः ।
क्षितिराजः क्षणाधीशः क्षणपतिः क्षणेश्वरः ॥ ८४ ॥
क्षणप्रियः क्षमानाथः क्षणदानायकःप्रियः ।
क्षणिकः क्षणदाधीशः क्षणदाप्राणदः क्षमी ॥ ८५ ॥
क्षमः क्षोणिपतिः क्षोभः क्षोभकारी क्षमाप्रियः ।
क्षमाशीलः क्षमारूपः क्षमामण्डनमण्डितः ॥ ८६ ॥
क्षमानाथः क्षमाधारः क्षमाकारी क्षमाकरः ।
क्षेमः क्षीणरजाः क्षुद्रः क्षुद्रपानविशारदः ॥ ८७ ॥
क्षुद्रेशानः क्षणाकारः क्षीरपानकतत्परः ।
क्षीरशायी क्षणेशानः क्षोणिभृत् क्षणदोत्सवः ॥ ८८ ॥
क्षेमङ्करः क्षमालुब्धः क्षमाशास्त्रविशारदः ।
क्षमीश्वरः क्षमाकामः क्षमाहृदयमण्डनः ॥ ८९ ॥
नीलाद्रिरुचिराशीशो नीलपर्वतसन्निभः ।
नीलमणिप्रभारम्यः शशिभूषणभूषितः ॥ ९० ॥
शशधरः शरीभूतो मुण्डमालाविभूषितः ।
मुण्डस्थो मुण्डसन्तुष्टो मुण्डमालाधरोऽनघः ॥ ९१ ॥
दिग्वासा विदिगाकारो दिगम्बरवरप्रदः ।
दिगम्बरीश आनन्दो दिगम्बरतनूद्भवः ॥ ९२ ॥
पिङ्गलैकजटो धृष्टो डमरूवादनप्रियः ।
सृणीकरः सृणीशानः खड्गधृक् खड्गपालकः ॥ ९३ ॥
शूलहस्तो मतङ्गाभो मातङ्गोत्सवसुन्दरः ।
अभयङ्कर ऊर्वङ्गो लङ्कापतिविनाशनः ॥ ९४ ॥
नगाशयो नगेशानो नागमण्डनमण्डितः ।
नगाकारो नगाधीशो नगशायी नगप्रियः ॥ ९५ ॥
घटोत्सवो घटाकारो घण्टावाद्यविशारदः ।
कपालपाणिरम्बेशः कपालासनसादनः ॥ ९६ ॥
पद्मपाणिकपालश्च त्रिनेत्रो नागवल्लभः ।
किङ्किणीजालसन्तुष्टो जलप्रायो जलाकरः ॥ ९७ ॥
अपमृत्युहरो मायामोहमूलविनाशनः ।
आयुधः कमलानाथः कमलाकान्तवल्लभः ॥ ९८ ॥
राज्यदो राजराजेशी राजीवपट्टशोभनः ।
डाकिनीनायको नित्यो नित्यधर्मपरायणः ॥ ९९ ॥
डाकिनीहृदयज्ञानी डाकिनीदेहनाशकः ।
डाकिनीप्राणदः शुद्धः श्रद्धेयचरितो विभुः ॥ १०० ॥
हेमप्रभो हिमेशानो हिमानीप्रियदर्शनः ।
हेमदो मर्मदो नामी नामधेयो नगात्मजः ॥ १०१ ॥
वैकुण्ठो वासुकीप्राणो वासुकीकण्ठभूषणः ।
कुण्डलीशो मखध्वंसी मखराजो मखेश्वरः ॥ १०२ ॥
मखाकारो मखाधीशो मखमालाविभूषणः ।
अम्बिकावल्लभो वाणीपतिर्वाणीविशारदः ॥ १०३ ॥
वाणीशो वाचःप्राणश्च वचस्थो वचनप्रियः ।
वेलाधरो दिशामीशो दिङ्नागो हि दिगीश्वरः ॥ १०४ ॥
दूर्वाप्रियो दुराराध्यो दारिद्र्यभयभञ्जनः ।
तर्कस्तर्कप्रियस्तर्क्यो वितर्कस्तर्कवल्लभः ॥ १०५ ॥
तर्कसिद्धोऽतिसिद्धात्मा सिद्धदेहो गुहाशयः ।
ग्रहगर्भो ग्रहेशानो गन्धगन्धी विशारदः ॥ १०६ ॥
मङ्गलो मङ्गलाकारो मङ्गलवाद्यवादकः ।
मङ्गलीशो विमानस्थो विमानो नैकनायकः ॥ १०७ ॥
बुधेशो विबुधाधीशो बुधवारो बुधाकरः ।
बुधनाथो बुधप्रीतो बुधवन्द्यो बुधाधिपः ॥ १०८ ॥
बुधसिद्धो बुधप्राणो बुधबुद्धो बुधप्रियः ।
सोमप्रभो मनःसिद्धो मनोजप्राणनाशनः ॥ १०९ ॥
सोमेशो मशकाकारो सोमपाः सोमनायकः ।
कामगः कामहा बौद्धः कामनाफलदोऽधिपः ॥ ११० ॥
त्रिदशो दशरात्रेशो दशाननविनाशनः ।
लक्ष्मणो लक्ष्यसम्भर्ता लक्ष्यसङ्ख्यो मनःप्रियः ॥ १११ ॥
विभावसुर्नलेशानो नायको नगजाप्रियः ।
नलकान्तिर्नलोत्साहो नरदेवो नराकृतिः ॥ ११२ ॥
नरपतिर्नरेशानो नारायणनरेश्वरः ।
अनिलो मारुतो मांसो मांसैकरससेवितः ॥ ११३ ॥
मरीचिरमरेशानो मागधो मगधप्रभुः ।
सुन्दरीसेवकोद्धारी द्वारदेशनिवासनः ॥ ११४ ॥
देवकीगर्भसञ्जातो देवकीसेवकः कुहूः ।
बृहस्पतिः कविः शुक्रः शारदासाधकप्रियः ॥ ११५ ॥
शारदासाधकप्राणः शारदासेवकोत्सुकः ।
शारदासाधकश्रेष्ठो वीतरागो गजप्रभुः ॥ ११६ ॥
मांसप्रियो मधुप्राणो मधुमांसमहोत्सवः ।
मधुपो मधुपश्रेष्ठो मधुपानसदारतिः ॥ ११७ ॥
मोदकादानसम्प्रीतो मोदकामोदमोदितः ।
आमोदामोदितो नन्दो नन्दिकेशो नदेश्वरः ॥ ११८ ॥
नदीप्रियो नदीनाथो नदीतीररुहस्तपाः ।
तपनस्तापनस्ताम्रतापहा तापकारकः ॥ ११९ ॥
पतङ्गो गोमुखो गौरो गोपालो गोपवर्धनः ।
गौपतिर्गोपसंहर्ता गोवृन्दैकप्रियोऽतिगः ॥ १२० ॥
गर्विष्ठो गुणरम्यश्च गुणसिन्धुर्गुरुप्रियः ।
गुणपूज्यो गुणोपेतो गुणवाद्यो गुणोत्सुकः ॥ १२१ ॥
गुणीशः केवलो गर्भः सुगर्भो गर्भरक्षकः ।
गाम्भीर्यधारको धर्ता विधर्ता धर्मपालकः ॥ १२२ ॥
जगदीशो जगन्मित्रो जगत्त्राता जगत्प्रभुः ।
जगद्धाता जगद्भोक्ता जगज्जाड्यविनाशनः ॥ १२३ ॥
जगत्कर्ता जगद्धर्ता जगज्जीवनजीवनः ।
मालतीपुष्पसुप्रीतो मालतीकुसुमोत्सवः ॥ १२४ ॥
मालतीकुसुमाकारो मालतीकुसुमप्रभुः ।
रसालमञ्जरीरम्यो रसगन्धनिषेवितः ॥ १२५ ॥
रसालमञ्जरीलुब्धो रसालतरुवल्लभः ।
रसालतरुवासी वै रसालफलसुन्दरः ॥ १२६ ॥
रसालरससन्तुष्टो रसालरसलालसः ।
केतकीपुष्पसन्तुष्टो केतकीगर्भसम्भवः ॥ १२७ ॥
केतकीपत्रसङ्काशः केतकीप्राणनाशनः ।
गर्तस्थो गर्तगम्भीरो गर्तेशो गर्तनायकः ॥ १२८ ॥
गर्तगेशोऽतिगर्तस्थो गर्ततीरनिवासकः ।
गणसेव्यो गणाध्यक्षो गणराजो गणाह्वयः ॥ १२९ ॥
आनन्दभैरवो भीरुर्भैरवेशो रुरुर्भगः ।
सुब्रह्मभैरवो वामभैरवो भूतभावनः ॥ १३० ॥
भैरवीतनयो देवीपुत्रः पर्वतसम्भवः ।
नाम्ना येन सहस्रेण स्तुत्वा बटुकभैरवम् ॥ १३१ ॥
लभते ह्यतुलां लक्ष्मीं देवानामपि दुर्लभाम् ।
उपदेशं गुरोर्लब्ध्वा योगे त्रिमङ्गली भवेत् ॥ १३२ ॥
अष्टम्यां वा चतुर्दश्यां वासरे भूमिसम्भवे ।
शुक्रे वा रविसङ्क्रान्तौ योगोऽयमुत्तमः प्रभो ॥ १३३ ॥
तस्मिन् योगे महेशानि सर्वसिद्धिमवाप्नुयात् ।
लक्षमावर्तयेन्मन्त्रं मन्त्रराजं नगेश्वरि ॥ १३४ ॥
नित्यकर्मसुसिद्ध्यर्थं तत्फलं लभते ध्रुवम् ।
स्तवमेनं पठेन्मन्त्री पाठयन् वा यथाविधि ॥ १३५ ॥
दुर्लभां लभते सिद्धिं सर्वदेवनमस्कृताम् ।
न प्रकाश्यं च पुत्रेषु भ्रष्टेषु तु कदाचन ॥ १३६ ॥
अन्यथा सिद्धिरोधः स्याद्वातुलो वा भवेत्प्रियः ।
स्तवस्यास्य प्रसादेन देवनायकवत्प्रियः ॥ १३७ ॥
सङ्ग्रामे विजयेच्छत्रून् मातङ्गानिव केसरी ।
राजानं वशयेत् सद्यो देवानपि वशं नयेत् ॥ १३८ ॥
किं वा परं फलं नाथ स्तवराजस्य कथ्यताम् ।
यद्यन्मनसि सङ्कल्प्य स्तवमेनमुदीरयन् ॥ १३९ ॥
तत्तदाप्नोति देवेशं बटुकस्य प्रसादतः ।
आपदां हि विनाशाय कारणं कान्त दुर्लभम् ॥ १४० ॥
देवासुररणे घोरं देवानामुपकारकम् ।
प्रकाशितं मया नाथ तन्त्रे भैरवदीपके ॥ १४१ ॥
अपुत्रो लभते पुत्रं षण्मासान् निरतो नरः ।
पठित्वा पाठयित्वाऽपि स्तवराजमनुत्तमम् ॥ १४२ ॥
दरिद्रो लभते लक्ष्मीमीप्सितामपि निश्चलाम् ।
कन्यार्थी लभते कन्यां सर्वरूपसमन्विताम् ॥ १४३ ॥
प्रदोषे बलिदाने च वशयेदखिलं जगत् ।
वटे वा बिल्वमूले वा रम्भायां विपिनोऽपि वा ॥ १४४ ॥
जपेत्सततमालक्षं मन्त्रराजस्य सिद्धये ।
वर्णलक्षं जपेद्वापि दिङ्मात्रं हि प्रदर्शितम् ॥ १४५ ॥
पूजयेत्तु तिलैर्माषैर्दुग्धैर्मांसैर्झषैस्तथा ।
घृतपक्वान्नतो वाऽपि जेमनै रससङ्कुलैः ॥ १४६ ॥
पूजयेद्धारयेद्वाऽपि स्तवमेनं सुसाधकः ।
पठेद्वा पाठयेद्वाऽपि यथाविधि सुरप्रिये ॥ १४७ ॥
शत्रुतो न भयं तस्य नाग्निचौरास्त्रवज्रजम् ।
ज्वरादिसम्भवं वापि सत्यं सत्यं महेश्वरि ॥ १४८ ॥
भैरवाराधनाशक्तो यो भवेत्साधकः प्रभो ।
सदाशिवः स विज्ञेयो भैरवेणेति भाषितम् ॥ १४९ ॥
श्रीमद्भैरवराजसेवनविधौ वैय्यग्रमासेदुषः
पुंसः पञ्चविधा भवन्ति नवधा ह्यष्टौ तथा सिद्धयः ।
क्षोणीपालकिरीटकोटिमणिरुन्मालाभरैर्भूयशो
मौग्ध्यं पादपयोजयोर्विजयते मूर्ध्नि प्रभोश्छत्रताम् ॥ १५० ॥
इति श्रीभैरवतन्त्रोक्त श्री बटुकभैरव सहस्रनाम स्तोत्रम् ॥