కర్పూరం అనేది ఒక చెట్టు జిగురు. ఈ జిగురుని శుభ్రపరచగా కర్పూరం తయారగును . కర్పూరం నందు అనేక రకాలు ఉన్నవి. వాటిలో ప్రాచీన ఆయుర్వేద గ్రంథాలలో అతి ముఖ్యమైన 13 రకాల గురించి చాలా చక్కగా వివరించారు .
ఇప్పుడు మీకు ఆ 13 రకాల కర్పూరం పేర్లు తెలియచేస్తాను . అవి
* పోతాస కర్పూరం .
* భీమసేన కర్పూరం .
* సితకర కర్పూరం .
* శంకరావాస కర్పూరం .
* పాంశు కర్పూరం .
* పింజ కర్పూరం .
* అబ్దసారక కర్పూరం .
* హిమాదాలుకాక కర్పూరం .
* యూతికా కర్పూరం .
* హిమ కర్పూరం .
* తుషార కర్పూరం .
* శీతల కర్పూరం .
* ప్రత్త్రికా కర్పూరం .
ఇలా అనేక రకాలు కలవు . ఇదియే కాకుండా కర్పూరం చెట్టు యొక్క సారము మరియు జిగురు లక్షణాన్నిబట్టి కూడా 3 రకాలుగా వర్గీకరిస్తారు . అందు చెట్టు యొక్క పైభాగము నుండి తీయు కర్పూరమును "శిరోజం " అని పిలుస్తారు . ఇది మిక్కిలి తెల్లగా ఉండి అద్దము వలే ప్రతిబింబించబడును. మ్రాని మధ్యభాగము నందలి పుట్టునది " మధ్యమం " అనబడును. ఇది పైభాగములో ఉన్న అంత తెల్లగా ఉండక సామాన్యముగా ఉండును. కొంచం గౌరవర్ణములో ఉండును. చెట్టు మిగిలిన భాగములలో లభ్యం అగునది సాధారణముగా ఉండును. ఇప్పుడు మనకి బజారులలో లభ్యం అయ్యేది ఈ సాధారణ రకము. కర్పూరం చెట్టు మధ్య మాను ( కాండం ) నుంచి తీసినది కొంచం పసుపు రంగుతో ఉండును. ఇది కర్పూరములన్నింటిలోను ఉత్తమం అయినది.
సరైన అవగాహన లేకుండా వైద్యులు అని చెప్పుకునేవారు హారతి కర్పూరమును పచ్చ కర్పూరముగా చూపించి భ్రమింపచేయుచున్నారు . పచ్చ కర్పూరం లేత పసుపు రంగుతో సువాసనగా ఉండును. తిరుపతి శ్రీవెంకటేశ్వరస్వామి వారి లడ్డు ప్రసాదం నందు ఈ పచ్చకర్పూరం విరివిగా వాడుతారు . హారతికర్పూరం విషతుల్యము. ఒక్కోసారి ప్రాణాలు తీయును . లోపలికి ఇవ్వడం నిషిద్దం.