చరాచరగురుం నౌమి గురుం సర్వోపకారకమ్ |
యస్య సంకీర్తనాదేవ క్షణాదిష్టం ప్రజాయతే || ౧ ||
బృహస్పతిః సురాచార్యో నీతిజ్ఞో నీతికారకః |
గురుర్జీవోఽథ వాగీశో వేదవేత్తా విదాంవరః || ౨ ||
సౌమ్యమూర్తిః సుధాదృష్టిః పీతవాసాః పితామహః |
అగ్రవేదీ దీర్ఘశ్మశ్రుర్హేమాంగః కుంకుమచ్ఛవిః || ౩ ||
సర్వజ్ఞః సర్వదః సర్వః సర్వపూజ్యో గ్రహేశ్వరః |
సత్యధామాఽక్షమాలీ చ గ్రహపీడానివారకః || ౪ ||
పంచవింశతినామాని గురుం స్మృత్వా తు యః పఠేత్ |
ఆయురారోగ్యసంపన్నో ధనధాన్యసమన్వితః || ౫ ||
జీవేద్వర్షశతం సాగ్రం సర్వవ్యాధివివర్జితః |
కర్మణా మనసా వాచా యత్పాపం సముపార్జితమ్ || ౬ ||
తదేతత్పఠనాదేవ దహ్యతేఽగ్నిరివేంధనమ్ |
గురోర్దినేఽర్చయేద్యస్తు పీతవస్త్రానులేపనైః || ౭ ||
ధూపదీపోపహారైశ్చ విప్రభోజనపూర్వకమ్ |
పీడాశాంతిర్భవేత్తస్య స్వయమాహ బృహస్పతిః || ౮ ||
మేరుమూర్ధ్ని సమాక్రాంతో దేవరాజపురోహితః |
జ్ఞాతా యః సర్వశాస్త్రాణాం స గురుః ప్రీయతాం మమ || ౯ ||
ఇతి బృహస్పతి స్తోత్రమ్ |