కృష్ణావేణీపంచగంగాయుతిస్థం
శ్రీపాదం శ్రీవల్లభం భక్తహృత్స్థమ్ |
దత్తాత్రేయం పాదుకారూపిణం తం
వందే విద్యాం శాలినీం సంగృణంతమ్ || ౧ ||
ఉపేంద్రవజ్రాయుధపూర్వదేవైః
సపూర్వదేవైర్మునిభిశ్చ గీతమ్ |
నృసింహసంజ్ఞం నిగమాగమాద్యం
గమాగమాద్యంతకరం ప్రపద్యే || ౨ ||
పరిహృతనతజూర్తిః స్వీయకామప్రపూర్తి-
-ర్హృతనిజభజకార్తిః సచ్చిదానందమూర్తిః |
సదయహృదయవర్తీ యోగవిచ్చక్రవర్తీ
స జయతి యతిరాట్ దిఙ్మాలినీ యస్య కీర్తిః || ౩ ||
ద్రుతవిలంబితకర్మవిచారణా
ఫలసుసిద్ధిరతోఽమరభాగ్జనః |
అనుభవత్యకమేవ తదుద్ధృతౌ
హరిరిహావిరభూత్పదరూప్యసౌ || ౪ ||
విద్యున్మాలాతుల్యా సంపత్ప్రాఙ్మధ్యాంతేఽప్యస్యా ఆపత్ |
తత్తే ధార్యం జ్యోతిర్నిత్యం ధ్యానే మేఽస్తు బ్రహ్మన్ సత్యమ్ || ౫ ||
త్రిద్వారం తవ భవనం బహుప్రదీపం
విఘ్నేశామరపతియోగినీమరుజ్జైః |
జాహ్నవ్యావృతమభితోఽన్నపూర్ణయా చ
స్మృత్వా మే భవతి మతిః ప్రహర్షిణీయమ్ || ౬ ||
తతిం ద్విజానాం శివసోపజాతిం
పుష్ణాతి కృష్ణాఽత్ర వినష్టతృష్ణా |
అవాక్ప్రవాహాఽనుమతాశివాహా
యా సాఽష్టతీర్థా స్మృతిమేతు సార్థా || ౭ ||
కలౌ మలౌఘాంతకరం కరంజ-
-పురే వరే జాతమకామకామమ్ |
చరాచరాద్యం భువనావనార్థం
క్షణే క్షణే సజ్జనతానతాంఘ్రిమ్ || ౮ ||
భుజంగప్రయాతాద్గుణోత్థాదివాస్మా-
-ద్భవాద్భీత ఆగత్య న త్యక్తుమిచ్ఛేత్ |
నృసింహస్య వాట్యాం ప్రభో రాజధాన్యాం
స యాయాత్సుధన్యాం గతిం లోకమాన్యామ్ || ౯ ||
ఇతి శ్రీవాసుదేవానందసరస్వతీ విరచితం దత్త పాదుకాష్టకమ్ |