వందే వాఙ్మనసాతీతం నిర్గుణం సగుణం గురుమ్ |
దత్తమాత్రేయమానందకందం భక్తేష్టపూరకమ్ || ౧ ||
నమామి సతతం దత్తమౌదుంబరనివాసినమ్ |
యతీంద్రరూపం చ సదా నిజానందప్రబోధనమ్ || ౨ ||
కృష్ణా యదగ్రే భువనేశానీ విద్యానిధిస్తథా |
ఔదుంబరాః కల్పవృక్షాః సర్వతః సుఖదాః సదా || ౩ ||
భక్తబృందాన్ దర్శనతః పురుషార్థచతుష్టయమ్ |
దదాతి భగవాన్ భూమా సచ్చిదానందవిగ్రహః || ౪ ||
జాగర్తి గుప్తరూపేణ గోప్తా ధ్యానసమాధితః |
బ్రహ్మబృందం బ్రహ్మసుఖం దదాతి సమదృష్టితః || ౫ ||
కృష్ణా తృష్ణాహరా యత్ర సుఖదా భువనేశ్వరీ |
యత్ర మోక్షదరాడ్దత్తపాదుకా తాం నమామ్యహమ్ || ౬ ||
పాదుకారూపియతిరాట్ శ్రీనృసింహసరస్వతీ |
రాజతే రాజరాజశ్రీదత్తశ్రీపాదవల్లభః || ౭ ||
నమామి గురుమూర్తే తం తాపత్రయహరం హరిమ్ |
ఆనందమయమాత్మానం నవభక్త్యా సుఖప్రదమ్ || ౮ ||
కరవీరస్థవిదుషమూఢపుత్రం వినిందితమ్ |
ఛిన్నజిహ్వం బుధం చక్రే తద్వన్మయి కృపాం కురు || ౯ ||
ఇతి శ్రీమత్పరమహంస పరివ్రాజకాచార్య శ్రీవాసుదేవానందసరస్వతీ విరచితం ఔదుంబర పాదుకా స్తోత్రమ్ |