బ్రహ్మోవాచ |
శృణుధ్వమృషయః సర్వే శనిపీడాహరం మహత్ |
కవచం శనిరాజస్య సౌరేరిదమనుత్తమమ్ || ౧ ||
కవచం దేవతావాసం వజ్రపంజరసంజ్ఞకమ్ |
శనైశ్చరప్రీతికరం సర్వసౌభాగ్యదాయకమ్ || ౨ ||
అస్య శ్రీశనైశ్చర వజ్రపంజర కవచస్య కశ్యప ఋషిః అనుష్టుప్ ఛందః శ్రీ శనైశ్చరః దేవతా శ్రీశనైశ్చర ప్రీత్యర్థే జపే వినియోగః ||
ఋష్యాదిన్యాసః –
శిరసి కశ్యప ఋషయే నమః |
ముఖే అనుష్టుప్ ఛందసే నమః |
హృది శ్రీ శనైశ్చర దేవతాయై నమః |
సర్వాంగే శ్రీశనైశ్చర ప్రీత్యర్థే పాఠే వినియోగాయ నమః ||
ధ్యానమ్ –
నీలాంబరో నీలవపుః కిరీటీ
గృధ్రస్థితస్త్రాసకరో ధనుష్మాన్ |
చతుర్భుజః సూర్యసుతః ప్రసన్నః
సదా మమ స్యాద్వరదః ప్రశాంతః ||
కవచమ్-
శిరః శనైశ్చరః పాతు ఫాలం మే సూర్యనందనః |
నేత్రే ఛాయాత్మజః పాతు పాతు కర్ణౌ యమానుజః || ౧ ||
నాసాం వైవస్వతః పాతు ముఖం మే భాస్కరః సదా |
స్నిగ్ధకంఠశ్చ మే కంఠం భుజౌ పాతు మహాభుజః || ౨ ||
స్కంధౌ పాతు శనిశ్చైవ కరౌ పాతు శుభప్రదః |
వక్షః పాతు యమభ్రాతా కుక్షిం పాత్వసితస్తథా || ౩ ||
నాభిం గ్రహపతిః పాతు మందః పాతు కటిం తథా |
ఊరూ మమాంతకః పాతు యమో జానుయుగం తథా || ౪ ||
పాదౌ మందగతిః పాతు సర్వాంగం పాతు పిప్పలః |
అంగోపాంగాని సర్వాణి రక్షేన్మే సూర్యనందనః || ౫ ||
ఫలశ్రుతిః –
ఇత్యేతత్కవచం దివ్యం పఠేత్ సూర్యసుతస్య యః |
న తస్య జాయతే పీడా ప్రీతో భవతి సూర్యజః || ౬ ||
వ్యయజన్మద్వితీయస్థో మృత్యుస్థానగతోఽపి వా |
కలత్రస్థో గతో వాఽపి సుప్రీతస్తు సదా శనిః || ౭ ||
అష్టమస్థే సూర్యసుతే వ్యయే జన్మద్వితీయగే |
కవచం పఠతే నిత్యం న పీడా జాయతే క్వచిత్ || ౮ ||
ఇత్యేతత్కవచం దివ్యం సౌరేర్యన్నిర్మితం పురా |
ద్వాదశాష్టమ జన్మస్థ దోషాన్నాశయతే సదా || ౯ ||
ఇతి శ్రీబ్రహ్మాండపురాణే బ్రహ్మనారదసంవాదే శ్రీ శని వజ్రపంజర కవచమ్ |